Seanca gjyqësore për dosjen “5D”, është shtyrë për në datën 3 korrik, ora 10:30.
Shkak i shtyrjes së seancës u bë mungesa e dy prej mbrojtësve ligjorë të të pandehurve.
Seanca e sotme kishte për qëllim marrjen e deklarimeve të 15 dëshmitarëve të thirrur nga organi i posaçëm i akuzës.
Lista e dëshmitarëve:
1. Eduard Meta
2. Muhamet Petriti
3. Alfred Qato
4. Sabrina Qama
5. Jonida Hoxhaj
6. Jona Bejko
7. Manjola Bunguri
8. Algert Çifliku
9. Marenglen Lika
10. Klotilda Haxhiaj
11. Kristi Grembi
12. Vjola Bilçari
13. Orjola Tane
14. Ismet Elezaj
15. Armand Çeçe
Kujtojmë se të pandehurit janë: Mariglen Qato, Redi Molla, Taulant Tusha, Enton Punavija, Julian Zanaj, Enton Punavija, Albano Janku dhe Nestor Muhametllari.
Dënimet
Ish-drejtoresha e “Tirana Parking”, Englantina Zere, mund të kryejë 6 muaj burg. Gjykata e Posaçme e Shkallës së Parë e cilësoi atë fajtore për shkelje të barazisë në tendera. Trupa gjykuese pranoi kërkesën e SPAK për dënimin e Zeres. Po ashtu, togat e zeza kanë rrëzuar kërkesën e mbrojtjes për pezullim të dënimit me burg dhe vendosjen e saj në shërbim prove ose punë në interes publik.
Fajtorë për të njëjtën vepër penale u shpallën edhe bashkëpandehurit Enkelejda Qyta, Bruno Koçi dhe Rivjola Baxha, në cilësinë e anëtarëve të Komisionit të Vlerësimit të Ofertave, si dhe anëtari i Njësisë së Prokurimit, Kristo Zhulati. Edhe për ta, gjykata caktoi nga 6 muaj burg. Nëse Gjykata e Posaçme e Apelit lë të pandryshuar vendimin e shkallës së parë, ata duhet të arrestohen dhe të kryejnë dënimin me burg.
Për të 5 të pandehurit e njërit nga fraksionet e dosjes “5D”, gjykata dha edhe dënim plotësues që për 5 vite të mos ushtrojnë asnjë funksion publik.
Hetimet e SPAK
Sipas hetimeve të SPAK, 5 të pandehurit kanë krijuar avantazhe dhe privilegje të padrejta për bashkimin e operatorëve ekonomikë fitues “V.A.S Konstruksion sh.p.k” dhe “Rroku Guest sh.p.k”, për tenderin e “Rikonstruksionit të sheshit të parkimit tek Selman Stërmasi”, të zhvilluar më 1 tetor të vitit 2019.
Në atë kohë, kompania “5D” kishte emrin tjetër “V.A.S Konstruksion sh.p.k”. Prokuroria e Posaçme pretendon se kjo kompani zotërohet në mënyrë de facto nga ish-kreu i Ujësjellësit, Redi Molla, dhe ai i IMT-së, Mariglen Qato. Të dy janë të pandehur nga SPAK dhe po gjykohen për dosjen “5D” me procedurën e gjykimit të zakonshëm.
Më herët, gjykata dënoi edhe disa ish-zyrtarë të Bashkisë së Tiranës për të njëjtën çështje, duke theksuar se kanë favorizuar kompaninë e ish-kolegëve të tyre për të marrë tendera nga Bashkia e Tiranës.
Discussion about this post