Shkarkim i bujshëm në Serie A, Roma merr vendimin e papritur për De Rossin

Daniele De Rossi është shkarkuar nga skuadra e Romës vetëm pas katër ndeshjeve të para në kampionat.

Edhe pse vetëm pak kohë më parë drejtuesit verdhekuq deklaronin se me De Rosin kishin gjetur trajnerin për të ndërtuar një cikël, rezultatet nuk po vinin.

Ai kishte marrë sezonin e kaluar drejtimin e klubit, megjithatë starti i këtij kampionati ka qenë i tmerrshëm.

Ai në katër ndeshjet e para ka pësuar një humbje nga Empoli 1-2 dhe ka barazuar me skuadrat si Cagliari, Juventus dhe së fundmi Genoa.

Kjo i ka kushtuar edhe shkarkimin De Rossit dhe tashmw klubi e ka konfirmuar largimin e tij.

“AS Roma njofton se ka liruar Daniele De Rossin nga roli i trajnerit të ekipit të parë. Vendimi i klubit është marrë në interes të skuadrës, në mënyrë që të mund të rifillojë sa më shpejt rrugën e dëshiruar, në një kohë kur sezoni është ende në fillimin e tij.

Për Daniele, i cili do të jetë gjithmonë në shtëpi në klubin Giallorossi, një falënderim të përzemërt për punën e kryer muajt e fundit me pasion dhe përkushtim.  Do të vijojnë komunikimet mbi udhëzimet teknike të ekipit”, thuhet në njoftimin e klubit italian.