Humbja në Firenze kundër Fiorentinës ishte dramatike për Thiago Mottën, me Juventusin që në datën 23 mars vendosi të shkarkonte trajnerin vetëm nëntë muaj pas firmës.
Për herë të parë Motta ka vendosur të flasë dhe për “Corriere della Sera” thotë se nuk pranon që ka dështuar te “Zonja e Vjetër”, pasi ajo që ka “mbjellë do të mbetet”.
“Juve duhet të më jepte kohë, edhe nëse është e vërtetë që dy ndeshjet e fundit u luajtën keq dhe drejtuesit e Juventusit, në mënyrë legjitime, zgjodhën një rrugë tjetër.
Jam i zhgënjyer sepse nuk shkoi ashtu siç shpresoja, veçanërisht në Kupën e Italisë dhe Champions League. Por nuk dua të dëgjoj për dështim, ishim një pikë larg vendit të katërt, objektivi prioritar në fillim të sezonit”, tha ai.
Për gabimet e bëra në sezonin e tij të parë në Juventus, Motta është kritik me veten.
“Do të ndryshoja shumë gjëra. Do të ndryshoja zgjedhjet e mia në dy ndeshjet e fundit. Por nuk e pranoj që e gjithë puna e bërë të hidhet poshtë: me një ekip të ri të shkatërruar nga dëmtimet, ne ishim gati të arrinim objektivin”, tha ai.
Thiago humbet durimin kur i kërkohet të konfirmojë mosmarrëveshjet me lojtarët dhe me Giuntolin.
“Kushdo që e thotë këtë është gënjeshtar. Unë kam pasur një marrëdhënie të shkëlqyer me të gjithë lojtarët. Nuk pranoj shpifje. A do të thoshte Giuntoli se i vinte turp për zgjedhjen time? Asnjëherë nuk u grinda me drejtorin, kurrë”, vijoi.
Fjalë ngushëllimi për Koopmeiners. “Ai gjithmonë do të jetë në gjendje të bëjë më mirë, ai është ngarkuar me shumë pritshmëri për shkak të kostos së tij të lartë” dhe për vetë Yildiz, “ai do të ketë një të ardhme si protagonist, sepse përtej talentit të tij, ai është edhe një kampion si djalë”.
Mbyllja është një mesazh për tifozët e Juventusit. “I falenderoj për atë që përjetuam së bashku, Juve duhet të fitojë përsëri, nuk ka ndodhur shumë vite, mendoj se ajo që kemi mbjellë do të mbetet. Faleminderit që jeni pranë meje, qoftë edhe kritikisht, por gjithmonë me dashuri të madhe”, tha Motta mes të tjerash.
Discussion about this post