Ministri i Drejtësisë Ulsi Manja ka propozuar ditën e sotme shkarkimin e Drejtorit të Përgjithshëm të Burgjeve, Agim Ismaili. Propozimi është miratuar nga Këshilli i Ministrave dhe në vend të tij është emëruar Admir Abrija. Ky i fundit ka mbajtur detyrën e administratorit të Bashkisë së Tiranës për zonën e Farkës.
Kujtojmë se, në gusht të këtij viti, Kontrolli i Lartë i Shtetit ka kërkuar nga Ministria e Drejtësisë shkarkimin nga detyra të Ismailit dhe të 3 zyrtarëve të tjerë në lidhje me një tender për ushqimin në burgje dhe për furnizim me ilaçe.
Tenderi me vlerë 1.8 milionë lekë, sipas KLSH, është realizuar në shkelje me ligjin dhe për këtë arsye, i kërkohet prokurorisë hetimi i çështjes ndërsa Ministrisë së Drejtësisë, shkarkimi i 4 zyrtarëve.
Nga ana tjetër, Admir Abrija ka qenë një nga vartësit e ministres Elisa Spiropalit, në kohën kur ishte drejtoreshë e Përgjithshme e Doganave. Gjatë kësaj kohe emri i Admir Abrijas u përmend nga KLSH, pasi bashkë me zyrtarët e tjerë të lartë, përdorën një shumë parash nga buxheti i doganave për të përmirësuar gjuhën angleze. Më pas ai mbajti detyrën e administratorit të Bashkisë së Tiranës për zonën e Farkës, post që e pasoi me detyrën e Prefektit të Tiranës.
Discussion about this post