Ministri i Jashtëm i Kinës, Qin Gang është liruar nga detyrat e tij, njoftuan të martën media shtetërore kineze. Ai ishte emëruar në këtë post vetëm shtatë muaj më parë.
Mediat ndërkombëtare kanë vënë në pah zhdukjen prej një muaji të ministrit nga jeta publike. Ai është parë për herë të fundit më 25 qershor dhe nuk dihet pse është zhdukur.
Qin Gang, 57 vjeç u emërua ministër i Jashtëm në dhjetor 2022, duke zëvendësuar paraardhësin e tij Wang Yi, njoftoi agjencia shtetërore e lajmeve Xinhua.
Asnjë arsyetim nuk është dhënë nga agjencia për largimin e tij.
New China transmeton edhe emërime të tjera të reja, si ai i ekonomistit Pan Gongsheng, kreut të bankës qendrore të Kinës.
Paraqitja e tij e fundit ishte gjatë takimit me homologun e tij vietnamez në Pekin. Që atëherë, ai ka munguar në disa takime diplomatike, duke përfshirë samitin e ASEAN-it në fillim të korrikut në Indonezi.
Zhdukja e tij nxiti thashethemet në rrjetet sociale, ndërsa Ministria e Jashtme fillimisht ia atribuoi mungesën e tij “arsyeve shëndetësore” dhe më pas heshti.
Wang Yi, të cilin ai e zëvendësoi, është zyrtari përgjegjës për çështjet diplomatike në Partinë Komuniste Kineze dhe është superior ndaj ministrit të Jashtëm.
Discussion about this post