Autoritetet peruane filluan sot shembjen e të ashtuquajturit “muri i turpit” që ndante banesat luksoze nga lagjet e varfra fqinje në kryeqytetin Lima.
Muri, disa pjesë të të cilit arrijnë lartësinë tre metra, është i përforcuar me tela me gjemba, i cili ndan njerëzit që jetojnë në shtëpi të rrënuara, në lagje me rrugë të pista pa shërbimet elementare (rrymë, ujë…) nga banorët e një lagje e asfaltuar dhe me vila luksoze, shumë prej të cilave kanë edhe një pishinë.
Muri, i cili është kthyer në simbol të pabarazisë në këtë vend të Andeve, tashmë po shembet me urdhër të Gjykatës Kushtetuese, pas një beteje ligjore katërvjeçare.
“Ai pengon kalimin e lirë, por gjithashtu dëmton dinjitetin e fqinjëve,” tha gjykatësi Gustavo Gutierrez, i cili po mbikëqyr prishjen. “Është një simbol i ndarjes që ndan dy grupe shoqërore dhe nuk duhet të ekzistojë,” shtoi ai.
Banorët e lagjes së pasur La Molina filluan ndërtimin e murit në vitet 1980, duke përmendur shqetësimet e sigurisë mbi aktivitetet e Shining Path, rebelët maoistë që kërkojnë të përmbysin qeverinë. Kjo organizatë, pas 20 vitesh konflikte të dhunshme me forcat e armatosura peruane, u shpërbë në mënyrë efektive në vitet 1990, por muri që ndan La Molina nga lagja e varfër e Villa Maria del Triunfo jo vetëm mbeti në vend, por edhe u zgjerua.
Francisco Dumler, administratori i La Molina në emër të bashkisë, tha se banorët do të respektojnë urdhrin e gjykatës, por prishja do të marrë kohë për shkak të kostove të paparashikueshme. “Duhet të sqarohet gjithashtu se nuk ka asnjë mundësi për hapje shtigje apo asnjë lloj aksesi rrugor direkt nga Villa Maria del Triunfo në La Molina”, shtoi ai.
Banorë të tjerë thanë se ishin të shqetësuar se njerëzit nga zona të tjera do të shpërngulen në lagjen e tyre. La Molina përmban parqe të harlisur dhe shtëpi të mëdha shumë milionëshe.
Në anën tjetër të murit po ndërtohen vazhdimisht stanet, lart e më lart në kodër dhe banorët përdorin shkopinj për të ngjitur e zbritur shpatin e pjerrët.
Discussion about this post