Prokuroria Publike e Brukselit ka çmontuar një rrjet kriminal shqiptar të përfshirë në kultivimin dhe shpërndarjen e marijuanës në të gjithë Belgjikën. Gjatë një operacioni të gjerë policor, i cili përfshiu mbi njëzet bastisje, u arrestuan 19 persona të dyshuar.
Hetimet nisën në tetor 2024, kur policia e zonës Bruksel-Perëndim (Molenbeek, Ganshoren, Jette, Koekelberg dhe Sint-Agatha-Berchem) mori informacione për një banor të Jette, i cili dyshohej se merrej me kultivimin dhe tregtimin e drogës. “Përmes përgjimeve telefonike, vëzhgimeve në terren dhe analizave financiare, u zbulua ekzistenca e një organizate kriminale të strukturuar,” deklaroi prokuroria. Organizata operonte kryesisht në komunat Jette dhe Ganshoren, duke i centralizuar aktivitetet e saj kryesore atje, përfshirë magazinimin e drogës, e cila më pas shpërndahej në të gjithë Belgjikën.
Sipas hetuesve, banda shfrytëzonte një rrjet pronash të marra me qira për të fshehur plantacionet e kanabisit. Gjithsej trembëdhjetë prona u identifikuan në komuna të ndryshme si Sint-Genesius-Rode, Lasne, Uccle, Sint-Pieters-Woluwe, Mons, Fontaine-l’Evêque, Herent, Gosselies, Rixensart, Bertrix, Soignies dhe Jette. Këto ambiente ndodheshin në zona të banuara, me qiratë mujore që varionin nga 1700 deri në 2600 euro. Për të shmangur gjurmimin, kontratat e qirasë përfundoheshin me dokumente identiteti të falsifikuara.
Në fund të janarit, operacioni policor çoi në zbulimin dhe shkatërrimin e njëmbëdhjetë plantacioneve të kanabisit, ku kultivoheshin 7980 bimë. Sasia e drogës së prodhuar vjetor llogaritet mbi një ton, me një vlerë tregu rreth 4.2 milionë euro. Gjatë aksionit u sekuestruan gjithashtu 23 kilogramë marijuanë, 654 gram kokainë, 13 mijë euro, pesë automjete, një armë zjarri, 28 celularë dhe disa dokumente të falsifikuara.
Nga 19 të arrestuarit, 14 u ndaluan me urdhër të gjyqtarit hetues, ndërsa njëri prej tyre u dërgua në një qendër të mbyllur me qëllim deportimin në Shqipëri. Katër të tjerët u lanë të lirë. “Ky operacion shënon çmontimin e plotë të një rrjeti kriminal shqiptar që vepronte në rajonin tonë dhe në të gjithë Belgjikën,” njoftoi prokuroria, duke theksuar se hetimet po vazhdojnë.
Discussion about this post