Qytetarët vazhdojnë të qëndrojnë indiferentë pas apeleve nga policia për të shmangur në mënyrë absolute djegien e barishteve që ndodhen pranë banesave, pasi era mund të favorizojë flakët, çka mund të sjellë krijimin e një vatre zjarri me përmasa më të mëdha. Kështu dy persona janë vënë sot në hetim për zjarrvënie në territorin e qarkut Fier.
Shtetasi P. R., banues në Divjakë, pasi duke djegur disa barëra të thatë, zjarri i ka dalë jashtë kontrollit dhe për pasojë ka dëmtuar pronën e tjetrit duke i djegur bazën ushqimore të blegtorisë.
Gjithashtu, nga Specialistët për Hetimin e Krimeve në Komisariatin e Policisë Lushnjë filloi procedimi penal për shtetasin D. N., pasi gjatë natës në fshatin Plug, dyshohet se ka djegur një sipërfaqe toke me fshesë të korrur në pronësi të shtetasit M. Ç.
Sakaq specialistët e Sektorit të Qarkullimit Rrugor në DVP Fier arrestuan në flagrancë shtetasit:
B. M., 63 vjeç, banues në Çermë Proshkë, Divjakë, pasi në fshatin Çermë Proshkë, duke drejtuar automjetin tip “Benz” është përplasur me motomjetin tip “Dayang” me drejtues shtetasin E. K., 25 vjeç, dhe për pasojë është dëmtuar drejtuesi i motomjetit dhe pasagjeri, shtetasi A. Zh., 20 vjeç, të cilët ndodhen në spital nën kujdesin e mjekëve.
B. L., 42 vjeç, banues në Patos, pasi në fshatin Sheqishte, duke drejtuar automjetin tip “Opel” është përplasur me një motomjet me drejtues shtetasin Xh. M., 64 vjeç, dhe për pasojë është dëmtuar drejtuesi i motomjetit i cili ndodhet në spital nën kujdesin e mjekëve.
Materialet i kaluan Prokurorisë, për veprime të mëtejshme.
