Autoriteti Kombëtar i Ushqimit ka gjobitur 13 biznese ditën e sotme për shkak se zhvillonin aktivitetin në mungesë të higjienës dhe nuk zbatonin rregullat për sigurinë ushqimore. Përmes një njoftimi të publikuar në faqen e tij zyrtare, Autoriteti njofton se pjesa më e madhe e bizneseve të ndëshkuara janë fast-foode dhe markete.
“Sot AKU ka kryer 125 kontrolle zyrtare dhe monitorime në të gjithë vendin në operatorët e biznesit ushqimor të kategorive të ndryshme, si subjekte me aktivitet: njësi tregtimi ëmbëlsirash, anije peshkimi, magazinë ushqimore, fast food, njësi tregtimi/prodhimi akullore, stabiliment veze, etj.
Gjatë kontrolleve zyrtare në operatorët e biznesit ushqimor janë dhënë 13 masa administrative me paralajmërim për aktivitet jo në përputhshmëri me kornizën ligjore dhe rregullatore të sigurisë ushqimore. Gjithashtu u asgjësuan 6.773t produkte ushqimore”, thuhet në njoftim.
Ndër të tjera, AKU bën me dije se me fillimin e sezonit shkollor do të rriten dhe më shumë kontrollet në këto subjekte.
