KLSH kërkon shkarkimin e Edlira Bodes, drejtoreshë e Spitalit të Traumës, dhe dy zv.Drejtorëve në këtë spital.
Auditi i KLSH ka zbuluar ilaçe të skaduara në farmaci e pavione, si edhe ka rezultuar se s’ka ambiente morgu. Në këto kushte, KLSH ka kërkuar shkarkimin e drejtoreshës së spitalit të Traumës, Edlira Bode dhe dy zëvendës drejtorëve të tjerë.
Një prej tyre është Alfred Cake. Bode, ish-deputete e PS-së, drejton prej rreth dy vitesh spitalin e Traumës, një nga dy qendrat më të mëdha spitalore në vend, me një status pothuajse të njëjtë me QSUT.
“Pas shkeljeve të konstatuara në Raportin Përfundimtar të Auditimit, kërkojmë konkretisht “Ndërprerjen e menjëhershme të marrëdhënieve të punës” për:
E. B., me detyrë Drejtor i Përgjithshëm i SUT-së:
A. C., me detyrë Zv. Drejtor i Përgjithshëm Teknik i SUT-së.
E. R., me detyre zv Drejtor i Përgjithshëm Ekonomik i SUT-së”, thuhet në raport.
Në raport thuhet se në magazinën e farmacisë së Spitalit Universitar, gjendet një stok i konsiderueshëm medikamente dhe materiale mjekimi të skaduara.
“Në magazinën e farmacisë se SUT dhe ne pavijone deri në fund te periudhës se auditimit, gjendet një sasinë me medikamente te skaduara ne vlerën totale 9,275,420 lekë, e cila përbën një shpenzim jo eficent për SUT duke sjellë një efekt financiar negativ për buxhetin e shtetit”, shkruhet në raportin e KLSH-së.
Gjithashtu u konstatua përdorimi i ambienteve të pa përshtatshme për ruajtjen e barnave dhe materialeve të mjekimit.
Sipas KLSH, barnat dhe materialet e mjekimit të verifikuar në akt verifikimin e datës 13.01.2023, ruheshin në magazinën e mallrave të spitalit të Traumës, ku krahas mallrave gjendeshin dhe pajisje mjekësore jashtë përdorimit e me rrezikshmëri për shëndetin e njërit.
Ndërkohë kjo magazinë, nuk plotëson në asnjë drejtim kushtet e ruajtjes së barnave duke shtuar këtu se në këtë ambient gjenden dhe pajisje mjekësore jashtë përdorimit si radiografi etj.
Gjithashtu KLSH ka konstatuar se në kontratat me FSDKSH nuk është përcaktuar proçedura e planifikimit të barnave dhe medikamenteve.
“Në lidhje me Planifikimi i barnave dhe medikamenteve, nga auditimi rezulton se, për planifikimin e nevojave vjetore për barna dhe materiale mjekësore nga Shërbimet mjekësore në SUT, gjatë hartimit të projektbuxhetit dhe planit buxhetor (pas miratimit), nuk bëhet analizë mbi gjëndjen e ilaçeve, sasinë e konsumit të tyre vjetore, në mënyrë që të justifikojnë listën për nevojat e këtyre barnave. Gjithashtu është konstatuar se planifikimi nga shërbimet mjekësore është kryer pa marrë në konsideratë kërkesën dhe sasinë reale, sipas nevojës vjetore të secilit pavion”, shkruhet në raportin e KLSH-së.
Nga auditimi rezulton se gjithashtu se Spitali Universitar i Traumës nuk ka ambient dhe nuk është i pajisur me frigorifer-morg, për të bërë administrimin e trupave të pacientëve që ndërrojnë jetë në këtë spital.
Në vitin 2021 pranë këtij spitali kanë ndëruar jetë 90 pacient.
Discussion about this post