Laçi – Dinamo ishte ndeshja e parë hapëse e javës së 11-të në Kategorinë Superiore, të cilën kurbinasit e fituan me avantazhin e thellë 5-0 ndaj Dinamos.
Në përfundim të kësaj sfide, trajneri kryeqytetas Blendi Shkëmbi shprehi mjaft rezerva për paraqitjen e skuadrës, ku e përkufizoi këtë disfatë si mungesë karakteri nga ana e Dinamos.
“Dinamo nuk tregoi karakter, ndoshta patëm mundësi të barazonim, ndërsa pas golit të dytë duket sikur ishte fotokopje e ndeshjes me Tiranën. Treguam që dorëzohemi shpejt, ky ishte problemi ynë.
Nuk jam karakter që flas për futbollistët. Është e qartë se golin e parë e falëm vetë. Kur them që nuk ka karakter, e kam me të gjithë skuadrën, jo vetëm me një repart. Nëse jo të gjithë e bëjnë 100% punën e tyre, do të kemi probleme, si sot.
Kjo zgjidhet duke marrë përgjegjësi dhe duke qenë të përgjegjshëm. Duhet t’i kërkojmë falje klubit, presidentit dhe tifozëve. Nëse në ndeshje do të japim as sa bëjmë në stërvitje, nuk do të kishim këto rezultate të dobëta. Karakterin duhet ta kesh, ndryshe turpërohesh si ne sot.
Ndeshjet janë shumë afër, tani s’duhet t’i përsërisim gabimet në ndeshjen me Teutën. Nëse nuk ndryshojmë karakterin do të kemi probleme. Dua të besoj se kemi karakter për të ndryshuar, ndeshja tjetër është shumë shpejt. Ndoshta ka lojtarë që ende nuk e kuptojmë se çfarë kërkon kur klub,” mbylli trajneri Shkëmbi.
Discussion about this post