Kryetari i Njësisë Administrative të Kallmetit, Besnik Simoni dhe 41-vjeçari Altin Marku nuk komunikuan asnjë fjalë në lidhje me ngjarjen e ndodhur pak ditë më parë në seancën gjyqësore që u zhvillua ditën e djeshme në Spitalin e Traumës në Tiranë. Dy personat, Besnik Simoni dhe Altin Marku do të qëndrojnë në burg. Ata po marrin shërbim mjekësor për shkak të plagëve që morën gjatë përplasjes me armë zjarri në mesditën e së premtes në fshatin Kallmet. Gjyqtari Artan Hajredinaj e cilësoi të ligjshëm ndalimin e tyre dhe vendosi masën e sigurisë “Arrest në burg” për veprat penale “Vrasja me dashje, mbetur ne tentativë” dhe “Prodhimi dhe mbajtja pa leje e armëve dhe municionit luftarak”.
Përplasja e armatosur në Kallmet të Lezhës ka ndodhur ditën e premte, rreth orës 13:30 në rrugën që lidh fshatin Kallmet me superstradën Lezhë-Shkodër. Policia raportoi se ishte plagosur në një atentat me armë zjarri, punonjësi i pushtetit vendor Besnik Simoni. Më pas u zbulua se konflikti mes Markut dhe Simonit nisi brenda zyrës së zyrtarit e më pas u zhvendos në rrugë. Marku ishte në arrati për 4 orë kur u kap nga policia, u zbulua se edhe ai kishte mbetur i plagosur nga përplasja. Më pas u zbulua se mes dy personave kishte shkëmbim zjarri për konfliktin e 1 viti më parë që lidhet me sherrin në fushatën e Partisë Socialiste.
Discussion about this post