Shkencëtarët në të gjithë botën janë të shqetësuar në lidhje me një fenomen të madh diellor, i cili mund të shkatërrojë për një kohë të gjatë internetin. Zakonisht erërat diellore që vijnë në Tokë udhëhiqen nga jonosfera në polet që mbrojnë pjesën tjetër të planetit. Sidoqoftë, ky fenomen elektrik që mund të hyjë në Tokë do ndikojë në çdo gjë që lidhet me energjinë elektrike dhe të dëmtojë internetin në atë mënyrë që do të jetë e vështirë të kthehet menjëherë.
Sipas informacioneve në konferencën e komunikimit të të dhënave “SIGCOMM 2021”, bota nuk do të jetë gati për një ngjarje të tillë dhe mund të jetë katastrofike për jetën moderne.
Një asistent profesor në Universitetin e Kalifornisë tha se ashtu sikurse ndodhi me pandeminë e Covid, njerëzit do të jenë të papërgatitur për të përballuar situatën.
“Ajo që unë mendoj është se me pandeminë ne pamë se sa të papërgatitur ishin njerëzit. Nuk kishte asnjë protokoll për t’u marrë me të në mënyrë efektive. E njëjta gjë vlen edhe për elasticitetin e internetit. Infrastruktura jonë nuk është e përgatitur siç duhet për një ngjarje kaq të madhe diellore. Ky fenomen ndodh një herë në shekull. Në maj 1921 u raportuan zjarre në stacionet e energjisë në Mbretërinë e Bashkuar dhe Shtetet e Bashkuara, dhe në disa pjesë të botës ata hasën probleme me energjinë elektrike”, është shprehur ai.
Një gjeofizikant në Shërbimin Gjeologjik Amerikan ka thënë se bota jonë është rritur aq shumë në 100 vitet e fundit, saqë një ngjarje diellore e ngjashme me atë të vitit 1921 do të ishte katastrofike.
“Efektet kishin të bënin me ndërhyrjen në radio, telegrame dhe sisteme telefonike që ata përdorën në 1921. Çdo gjë që lidhet me energjinë elektrike nuk ishte aq e rëndësishme për njerëzit në 1921 sa është sot,” tha ai.
Nga ana e tij, zëvendësdrejtori i Qendrës Kombëtare për Kërkimet Atmosferike tha ndër të tjera, se stuhitë e forta diellore mund të ngarkojnë atmosferën dhe të parandalojnë transmetimin e sinjaleve për ditë me radhë.
