Sipas të dhënave të reja nga Shërbimi i Ndryshimeve Klimatike të BE-së (C3S) Copernicus, akulli i deteve në shkurt 2025 ka arritur nivelin më të ulët të regjistruar ndonjëherë, me një rënie alarmante si në Arktik (8% nën mesataren) ashtu edhe në Antarktik (26% nën mesataren).
Ekspertët theksojnë se ky fenomen i rrezikshëm përshpejtohet nga temperaturat rekord të larta, të cilat kanë ndikuar ndjeshëm në shkrirjen e akullit, duke rritur rrezikun e ndryshimeve klimatike dhe të ngrohjes globale.
Zëvendësdrejtoresha e C3S, Samantha Burgess, deklaroi se ky rekord negativ është një tjetër tregues i qartë i ndikimit të ngrohjes globale. “Mbulimi i ulët i akullit në të dy polet ka çuar në një minimum historik,” tha ajo.
Në shkurt, shkencëtarët regjistruan një anomali ekstreme të temperaturave në Arktik, me rritje mbi 20°C mbi mesataren, duke përshpejtuar shkrirjen e akullit. Ekspertët paralajmërojnë se humbja e akullit sjell pasoja serioze për klimën, pasi redukton reflektimin e rrezeve të diellit dhe përshpejton ngrohjen e planetit.
Discussion about this post