Përfundon miqësorja Shkëndija-Laçi. Kampionët e Maqedonisë së Veriut fituan 2-1 me përmbysje ndaj bardhezinjve të Shpëtim Duros në takimin e luajtur në Strugë.
Pjesa e parë foli për kurbinasit, të cilët gjetën golin e avantazhit në minutën e 37-të me anë të Dejan Zarubica, sulmuesit nga Mali i Zi dhe një prej afrimeve të merkatos.
Djemtë e Ernest Gjokës reaguan në fraksionin e dytë të ndeshjes dhe përmbysën rezultatin në 15 minutat e fundit të ndeshjes.
Penallti për kuqezinjtë në minutën e 75-të, Mario Dajsinani priti goditjen e Agim Ibraimit, i cili përfitoi nga topi i rikthyer dhe e dërgoi atë në rrjetë.
Pesë minuta më vonë erdhi edhe goli i fitores, pas një dalje me dy pasime të Shkëndijës dhe finalizimit të Dashmir Elezit.
Kampionët nga Tetova do të kenë përballë Mura (Slloveni) në raundin e parë të Champions, ndërsa Laçi do të sfidojë Podgoricën (Mali i Zi) në Conference League.
