Emocionet europiane sapo kanë nisur për skuadrat “kuqezi” dhe tashmë është momenti edhe për Shkëndijën e Tetovës.
Skuadra që përfaqëson Maqedoninë e Veriut do të luajë ndeshjen e parë kualifikuese në UEFA Conference League dhe do të masë forcat përballë Haverfordwest County.
Shkëndija e mbylli kampionatin në vendin e tretë, larg kreut, por tashmë fokusi i vetëm është Europa.
Skuadra e cila drejtohet nga Ardian Nuhiu do të luajë për të nëntin edicion radhazi në arenën europiane, ndërsa sezonin e kaluar, tetovarët kaluan dy raundet e para në Europa Conference League, por në fund aventura e tyre u ndal përballë suedezëve të AIK Solnës.
Eliminimi erdhi nga penalltitë, me Shkëndijën që sezonin e kaluar nuk e njohu humbjen në kohën e rregullt apo në shtesë, dhe nëse përjashtojmë serinë e penalltive përballë skuadrës nga lagja e Stokholmit, tetovarët regjistruan 3 fitore dhe 3 barazime në gjashtë ndeshje, ecuri kjo që i rrit ndjeshëm kreditet në këtë raund të parë kualifikues.
“Kuqezinjtë” kanë pësuar ndryshime gjatë merkatos, me disa largime, por mbi të gjitha me përforcime cilësore, me Shkëndijën që ka “peshkuar” edhe në Shqipëri.
Sezon i ri, kundërshtar i ri, por me të njëjtin objektiv dhe dëshirë, për të tentuar gjithçka për gjithçka, ndërsa përballë është skuadra uellsiane e Haverfordwest.
Një kundërshtar gati i panjohur dhe mund të quhen debutues, pasi më parë, uellsianët kishin luajtur vetëm 180 minuta në kualifikueset ish-Kupës UEFA (sot Europa League) në edicionin e largët 2004-2005.
Ndaj, në letër Shkëndija niset si favorite për të kaluar në raundin e dytë, me sfidën që do të luhet në Shkup duke nisur nga ora 20:00.
Ndërkohë, skuadra tjetër shqiptare e RMV-së, Shkupi do të përballet në transfertë e Kaunasit me Hagelmann Litaunen. Dueli mes klubit lituanez dhe djemve nga Çairi, do të startojë në orën 19:00.
Discussion about this post