Moti i keq me shi të dendur dhe erë që përfshiu gjatë natës fshatin Bleran të Njësisë Administrative Rrethina në Bashkinë e Shkodrës, ka dëmtuar banesat në këtë zonë.
Në zonën e Bleran-Bardhaj reshjet kanë shkaktuar dëme të mëdha, duke dëmtuar edhe infrastrukturën. Deri tani mësohet se rreth 30 banesa kanë prezencë uji.
Të indinjuar, banorët shprehen se mospastrimi i kanaleve ndër vite ka sjellë këtë situatë. Sipas tyre, uji ka shkaktuar dëme të mëdha dhe as policia nuk ka ndërhyrë për shkak të reshjeve.
“Ka ardhur stuhia nga ora 02:30. Shihni vetë. 1 metër e gjysmë ujë. Çfarë kam pasur brenda në shtëpi më ka bërë dëm. I ka shembur uji të tëra, avllinë. Ka 30 vjet që shteti nuk pastron kanale. Kam marrë në telefon policinë në 03;00 të natës. Hajdeni mo se u mbytën të tan mrena. Uji ka qenë 1 metër e gjysmë. Ka thënë policia nuk mundemi të vijmë se është përmbytur e gjithë Shkodra. Apeli im është që të pastrojnë kanalet”, thotë një banor.
Discussion about this post