Dy persona janë plagosur mëngjesin e sotëm gjatë një grabitje në fshatin Mavrovë të bashkisë Selenicë. Nga informacionet bëhet fjalë për një grabitje, ku mbetën të plagosur Fatjon dhe Vilson Dautaj (babë e bir). Sipas asaj çka ata kanë deklaruar në lidhje me plagosjen e tyre, burime nga policia bëjnë me dije se bëhet fjalë për një konflikt të Fatjon e Vilson Dautajt me 3 persona të cilët kishin shkuar për të grabitur stanin e tyre. Në momentet që babë e bir kanë pikasur grabitësit, menjëherë janë përplasur fizikisht me ta, ku dhe kanë mbetur të plagosur me thikë. Babë e bir kanë shkuar për të marrë ndihmë në spitalin e Vlorës, nga ku raportohet se 60-vjeçari Vilson Dautaj ndodhet në gjendje të rëndë shëndetësore pasi është goditur 3 herë me thikë, ku janë prekur organet jetësore.
Në momentet kur policia ka shkuar në Mavrovë, aty ka konstatuar 180 bimë narkotike, një pushkë dhe një automatik. Ky detaj ka bërë policinë e Vlorës të dyshojë se autorët, kishin shkuar për të vjedhur hashashin.
