Një sherr mes të rinjve ka ndodhur mbrëmjen e së premtes në Tiranë. Ngjarja ka ndodhur rreth orës 20:00, ku mësohet se një djalë rreth 30-vjeç është paraqitur në komisariat i gjakosur në fytyrë, për të bërë një denoncim. I riu ka rrëfyer para efektivëve të policisë se është dhunuar në vendin e punës, një biznes që ndodhet në Tiranë në pronësi të bashkëshortit të motrës së tij. Ai ka treguar se disa persona të armatosur e kanë futur në një makinë dhe e kanë goditur.
“Nuk e di si kam shpëtuar prej tyre. Ishin diku te 10 persona, prej tyre kishte të armatosur. Janë nga zona e Mamurrasit. Erdhën me makina me xhama të errët. Njëri më drejtoi armën. Pastaj më goditi duke më shkaktuar plagë me qytën e saj në kokë. Nuk dija ç’të bëja. U ndjeva në rrezik”, ka treguar ai.
Mësohet se pas denoncimit në komisariat i riu i është drejtuar Spitalit të Traumës për të marrë ndihmë mjekësore. Ndërkohë policia ka nisur hetimet për identifikimin e personave që ka denoncuar 30-vjeçari dhe vënien e tyre para drejtësisë.
