Kreu i Kadastrës, Artan Lame ka bërë sot një paralajmërim të fortë në lidhje me çështjen e pronave. Ai ka paralajmëruar se “furtuna sapo ka filluar” për të gjithë ata që kanë vendosur duart në regjistrat e pronave. Teksa shpërndante legalizimet në Synej, Lame hodhi poshtë akuzat se regjistrat i djeg vetë Kadastra, ndërsa tha më tutje se shprehu bindjen se prokuroria do t’i hyjë me themel kësaj çështje për të kontrolluar çdo detaj.
“Mos dëgjoni broçkullat poshtë e përjetë, jo i dogji, jo ngrihet natën, jo shkon Lamja natën djeg regjistrat. Prona e qytetarëve është e sigurt, unë dola në televizor dhe inventari është bërë pikërisht për këtë gjë. Është vënë një ditë zero, nga këtej nuk ndodh më asgjë, Prokuroria të vijë e të kontrollojë çfarë është bërë nga kjo ditë e më përpara, neve garantojmë që me pronën nuk luhet më. Ama të gjithë ata që kanë vendosur dorë mbi ato arkiva, të gjitha organizmat zyrtare të këtij shteti kanë të drejtën e Zotit të vijnë dhe ti kontrollojnë, e të kërkojnë llogari. Rrini të qetë për pronën tuaj të ligjshme, jam i bindur që Prokuroria do i hyjë me themel dhe ta vazhdojë këtë hetim, por unë besoj, s’më takon mua se nuk bëj parashikime të paprovuara”, tha Lame. Kujtojmë se shpesh herë Kadastra është përfshirë në skandale për humbje, grisje apo djegie të regjistrave të pronave, dhe pavarësisht se Lame e mohon ky skandal është nga mungesa e përgjegjshmërisë së punonjësve të tij.
Discussion about this post