Ka shkuar në tetë numri i infektimeve me Covid-19 te klubi i Tiranës. Mësohet se së fundmi ka rezultuar pozitiv në testin e koronavirusit edhe portieri Ilion Lika.
Ky është një problem i madh, pasi thuajse gjysma e skuadrës Bardheblu ndodhet në karantinë deri në momentin që do rezultojnë negativë.
Kjo nënkupton që sfida për Kupën e Shqipërisë dhe ajo e Superligës kundër Teutës të vendosen në rrezik. Duke parë rastet në rritje te klubi kryeqytetas është frika se mund të ketë të infektuar edhe persona të tjerë. Ndaj në një situatë të tillë shtyrja e tyre mund të shihet si zgjidhja më e mirë.
Deri më tani pozitiv me Covid-19 kanë rezultuar: Majkëll Ngo, Taulant Seferi, Erjon Hoxhallari, Marsel Ismajlgeci, Aldi Gjumsi si dhe dy pjesëtarë të stafit, Kosta Jani dhe Arzen Voci.
Voci dhe Hoxhallari rezultuan të infektuar nga testet e bëra në grumbullimin e Kombëtares para ndeshjes me Hungarinë./K.T/Gijotina.com
