Një restorant në qendër të Thethit është përfshirë nga flakët në orët e para të mëngjesit, duke shkaktuar panik mes banorëve dhe pushuesve.
Restoranti mësohet se është në pronësi të shtetaseve Petrit dhe Aida Gjeçaj.
Zjarri ka qenë i fuqishëm, duke shkatërruar plotësisht të gjithë ambientin e restorantit. Sipas dëshmive të pronarëve, ndërhyrja e zjarrfikëses ka ardhur me vonesë, ç’ka ka vështirësuar kontrollin e situatës.
Për shkak të rrezikut që flakët të përfshinin edhe strukturën ngjitur, gjatë natës është bërë evakuimi i dhjetëra turistëve që ishin të akomoduar në bujtinë.
Policia dhe grupi hetimor kanë mbërritur në vendin e ngjarjes. Pronari i restorantit shprehet se vetëm ekspertiza do të përcaktojë nëse zjarri është shkaktuar nga ndonjë defekt elektrik apo bëhet fjalë për një akt të qëllimshëm.
Pronarja e restorantit Aida Gjeçaj, e cila ka qenë e ftuar edhe në podkastin e Edi Ramës, ngre dyshime se kemi të bëjmë me një zjarrvënie të qëllimshme dhe jo që flakët të kenë ardhur nga ndonjë shkëndijë elektrike.
Ajo e lidh djegien e restorantit të saj me aksionin e Inspektoriatit të Mbrojtjes së Territorit në Theth për prishjen e ndërtimeve pa leje, të cilën e konsideron si një “koncidencë të keqe”, ku indirekt nënkupton se zjarri mund t’i jetë vendosur nga pronarët e bujtinave të tjera, të cilat i ka prishur shteti.
“Ekspertët thonë se energjia nuk ishte shuar fare, edhe pse godina ishte në flakë, gjë që përjashton shkëndijën elektrike. Unë nuk kam dyshime, nuk kam askujt borxh, s’kam pas as kërcënim as gjë, dhe nuk di pse ka ardhur. Unë jam një bujtinë me 5 dhoma, pasi s’kam dashur të ndërtoj asgjë pa leje, por s’di kujt t’ja vë gishtin. Koncidenca me aksionin në Theth është e keqe, sepse unë nuk kam procedim për prishje, pasi nuk kam ndërtime ose objekte pa leje. Kam zgjedhur të punoj me restorantin dhe 5 dhoma, duke pritur dhe përcjellë sa të kemi mundësi për t’u ofruar një shërbim maksimal turistëve dhe emrit të Thethit”, tha ajo për mediat.
Gjeçaj thotë se dëmi i shkaktuar nga zjarri vlerësohet rreth 150 mijë euro, duke shktuar se zjarrfikësja nuk ka shkuar në kohë dhe nuk i ka shpëtuar asgjë.
“Dëmi mund të jetë rreth 150 mijë euro, ja lë në dorë drejtësisë, por s’është nga energjia. Nuk kam dijeni, pasi gjendesha në Tiranë në momentin e zjarrit. Kur më njoftuan në dy të natës që kishte rënë zjarri në subjektin tim, u nisa dhe erdha. Komshinjtë kanë ndërhyrë sa kanë mundur, por s’kanë arritur të shpëtojnë asgjë. Kjo është struktura ime, që ishte restorant me panele diellore. Zjarrfikësja nuk ka arritur të vijë në kohë, por gjithsesi ka mbërritur. Falenderoj komshinjtë që kanë ardhur për të evituar shpërndarjen e zjarrit. Falë Zotit, nuk ka pasur dëme njerëzore, as nga familjarët, as nga turistët. Restoranti dhe biznesi janë në pronësinë time”, – përfundoi ajo.
Discussion about this post