Një aksident i shumfishtë ka ndodhur mesditën e së shtunës në rrugën Kukës-Uzinë që lidh segmentin Kukës-Morinë të Rrugës së Kombit. Mësohet se në aksident janë përfshirë katër automjete, por për fat të mirë nuk ka pasur pasoja në jetë njerëzish.
Sipas dëshmitarëve, ngjarja ka ndodhur si pasojë e lëvizjes me shpejtësi të një automjeti, i cili u përplas me një mjet tjetër në lëvizje. Më tej ai u përplas edhe me mjete të tjera të parkuara përpara një lokali në anë të rrugës.
Si pasojë e përplasjes, automjeti që shkaktoi aksidentin zinxhir është përmbysur por drejtuesi ka shpëtuar pa lëndime. Ai është nxjerrë nga klientët që ndodheshin në lokal. Theksojmë që ky aks rrugor në hyrje të qytetit të Kukësit ka ngarkesë të madhe të lëvizjes së automjeteve dhe është tepër i rrezikshëm pasi ka pamje të kufizuar dhe mungon sinjalistika.
Janë të shumta rastet e aksidenteve tragjike në këtë aks.
