Një ditë pas përgjysmimit të linjave të transporti urban në kryeqytet, Kamëz dhe Vorë, për shkak të rritjes së çmimit të karburantit, Shoqata e Transportit Urban ka paralajmëruar reduktim të mëtejshëm të shërbimit të transportit urban, nëse qeveria nuk merr masa.
Në një deklaratë për mediat Shoqata e Transportit Urban i ka kërkuar qeverisë indeksimin e çmimit, reduktimin e TVSH-së dhe heqjen e akcizës ose të taksës të qarkullimit për naftën e përdorur nga sektori i transportit.
Përfaqësuesit e Shoqatës i kanë kërkuar qeverisë të eliminojë disa taksa, në mënyrë që të mos ketë rritje çmimi për qytetarët.
Gjithashtu, shoqatat i bëri thirrje Bashkisë dhe qeverisë, të ulen në tryezë e të gjejnë një zgjidhje, pasi në të kundërt ata do të falimentojnë.Çmimi i biletës të transportit urban në Tiranë është 40 lekë dhe i abonesë të linjës 1,200 lekë dhe abonesë të përgjithshme 1,600 lekë.
Bashkia e Tiranës ka reaguar duke thënë se po e shqyrton çështjen.
Edhe në Shkodër transportit urban del me kërkesa: Nëse nuk merren masa, rrezikojmë kolapsin e plotë.
Transporti urban në Shkodër do të shkojë drejt kapitullimit dhe rrezikon mbylljen totale të këtij shërbimi. Deklarata vjen nga Melidion Dervishi, administrator i transportit urban në Shkodër.
Ai thotë se që nga data 8 gusht, kur është organizuar protesta për shërbimin e transportit urban, situata ka mbetur e njëjtë. “Mbështetja ka munguar si nga bashkia, ashtu edhe qeveria” – thekson Dervishi.
Sipas tij, ka informalitet nga furgonat, ndërsa çmimet vazhdojnë e rriten.
