Shorti i Ligës së Kombeve, përcaktohen dy sfidat gjysmëfinale

Në Nyon të Zvicrës u hodh shorti i “Final Four” të Nations League.

Në gjysmëfinale janë kualifikuar Holanda, Italia, Kroacia dhe Spanja, si vende të para në katër grupet e Ligës A.

Goglat vendosën dy përballjet Spanjë-Itali dhe Holandë-Kroaci.

Ndeshjet finale të eventit do të zhvillohen në Holandë nga data 14 qershor deri më datë 18 qershor teksa janë përcaktuar edhe dy qytetet mikpritëse, Rotterdam dhe Enschede.

Është tashmë e përcaktuar që Holanda do ta zhvillojë gjysmëfinalen e parë me Kroacinë në Rotterdam në stadiumin me 51.117 vende të “De Kuip”, po ashtu siç është vendosur që po në Rotterdam të luhet edhe finalja e madhe.

Ndërsa Spanja me Italinë do të përballen më 15 qershor në Enschede.

Kujtojmë se dy edicionet e mëparshme të Nations League janë fituar nga Portugalia dhe Franca.