Të premten e kaluar, Islanda u detyrua të mbyllte Lagunën e saj të famshme Blu, një nga atraksionet më të mëdha turistike të vendit nordik. Një “fazë e pasigurisë vullkanike” i vuri autoritetet në alarm më 25 tetor, datë në të cilën ndodhi një aktivitet i pazakontë sizmik. Që atëherë, janë regjistruar më shumë se 22 000 tërmete në këtë shtet.
Tani, autoritetet e Mbrojtjes Civile kanë shpallur gjendjen e jashtëzakonshme pas tërmeteve që mund të paralajmërojnë fillimin e një shpërthimi të afërt vullkanik. Autoritetet islandeze kanë zbuluar “ndryshime të rëndësishme” në akumulimin e magmës nëntokësore pranë qytetit Grandavik, ku jetojnë rreth 4 000 persona. Nisur nga kjo situatë, policia lokale ka urdhëruar evakuimin e popullsisë dhe shpalljen e gjendjes së jashtëzakonshme.
“Për momentin, nuk është e mundur të përcaktohet saktësisht nëse magma mund të arrijë në sipërfaqe. Ka indikacione se një sasi e konsiderueshme magme po lëviz në një zonë që shtrihet nga Sundhnjukagigar në veri, drejt Grindavik”, tha Shërbimi Meteorologjik islandez në një deklaratë.
Sipas raportit të fundit të ndarë nga agjencia lokale meteorologjike, shkalla e deformimit të tokës mbi magmë është më e madhe se matja e marrë në vrojtimet e mëparshme në Gadishullin Reykjanes. “Probabiliteti i një shpërthimi në të ardhmen e afërt është i madh”, lexohet në raport.
Tërmetet kanë qenë konstante që nga fundi i tetorit në gadishullin Reykjanes, ku ndodhet vullkani Fagradalsfjall, i vendosur vetëm 40 kilometra nga kryeqyteti Reykjavik. Hera e parë që ky vullkan shpërtheu ishte në vitin 2021 dhe shenjat aktuale të vëzhguara janë shumë të ngjashme me ato të atëhershme.
Por, këtë herë ka diçka ndryshe. Siç bëhet me dije nga autoritetet islandeze, aktualisht “sasia e magmës është dukshëm më e madhe se ajo e vërejtur në shpërthimet e Fagradalsfjall”. Sipas tyre, skenari më i mundshëm është se magma do të marrë disa ditë për të dalë në sipërfaqe. Sipas televizionit publik islandez, magma mund të jetë 1.5 kilometra e thellë.
Discussion about this post