Policia e Shkodrës ka shpallur në kërkim rektoren e Universitetit të Shkodrës, pasi dyshohet për korrupsion.
Sipas policisë, menjëherë pas denoncimit të një rast korrupsioni kanë referuar materialet procedurale në Prokurorinë pranë Gjykatës së Shkallës së Parë të Juridiksionit të Përgjithshëm Shkodër dhe e kanë shpallur rektoren në kërkim.
Gjithashtu policia thotë se për këtë rast u referuan materialet në Prokurori ku nisi procedimi në gjendje të lirë për shtetasen D. L., 36 vjeçe, banuese në Shkodër, pedagoge në universitetin “Luigj Gurakuqi”.
Rektorja Suzana Golemi, gjithashtu pedagoge, akuzohet se bashkëpunonte me kolegun e biokimisë Donalda Laçej dhe u merrnin studentëve deri në 150 € për provim. Denoncimi i studentëve u bë në një emision investigativ, ku me pamje u vendos një zarf me 150 euro në zyrën e rektores Golemi, dhe studenti në fjalë kaloi në provim. Policia e Shkodrës ka nisur hetimin për të dyja pedagoget.
Gjatë paradites së sotme Ministria e Arsimit pezulloi nga detyra Rektoren e Univeristetit të Shkodrës, Suzana Golemi. Në vendin e saj është komanduar Rajmonda Kërçira.
Njoftimi zyrtar
Morën para për të favorizuar nëpërmjet notave studentët, shpallet në kërkim rektorja e universitetit “Luigj Gurakuqi” dhe procedohet penalisht një pedagoge e këtij universiteti.
Specialistët për Hetimin e Krimeve të DVP Shkodër, menjëherë pas publikimit në emisionin investigativ “Stop”, të një rasti korrupsioni dhe shpërdorimi detyre, të kryer në universitetin “Luigj Gurakuqi”, Shkodër, kanë referuar materialet procedurale në Prokurorinë pranë Gjykatës së Shkallës së Parë të Juridiksionit të Përgjithshëm Shkodër, si dhe kanë shpallur në kërkim shtetasen S. G., 59 vjeçe, banuese në Shkodër, me detyrë rektore e universitetit “Luigj Gurakuqi”. Vijon puna për kapjen e 59-vjeçares.
Gjithashtu, për këtë rast u referuan materialet në Prokurori ku nisi procedimi në gjendje të lirë për shtetasen D. L., 36 vjeçe, banuese në Shkodër, pedagoge në universitetin “Luigj Gurakuqi”.
Në pamjet filmike të transmetuara në emisionin investigativ “Stop”, këto shtetase shfaqen duke iu marrë studentëve të universitetit, shuma parash, në këmbim të favorizimit të tyre nëpërmjet notave.
Materialet procedurale i kaluan Prokurorisë, për veprime të mëtejshme.
Drejtoria Vendore e Policisë Shkodër falënderon median dhe qytetarët që denoncojnë raste të paligjshmërive, si dhe i fton ata që të denoncojnë çdo rast paligjshmërie që mund të hasin në vijim, në Komisariatin Dixhital dhe në numrin pa pagesë 112.
Discussion about this post