Ish anëtari i Këshillit Kombëtar të Partisë Demokratike, Edvin Kulluri ka hequr dorë nga ambicia për të kandiduar për kreun e demokratëve duke thënë se i gjithë procesi është një farsë e shëmtuar.
Përmes një postimi në Facebook, Kulluri shprehet se vendimi i Komisionit Zgjedhor për të shpallur procedurat për zgjedhjen e kreut të PD janë të njëjta me praktikat që ndiqte ish kreu Lulzim Basha.
“Te dashur miq! Dje u njoha me vendimin e një Komisioni Zgjedhor të vetë emëruar pa vendim të Këshillit Kombëtar si organ i zgjedhur, që shpalli procedurat për zgjedhjet për Kryetar të PDSH! Meqenëse para disa muajsh shpalla vullnetin për të kandiduar për Kryetar të PDSH, konstatoj se: 1) Komisioni Zgjedhor është anti-statutor; 2) afati për “primare” prej 2 javësh është i njëjti me afatin e vendosur nga Lul Brava qershorin e kaluar, duke mos u lënë kohë kandidatëve për të bërë fushatë; 3) në këtë Komision ka anëtarë të njëjtë nga ata që vodhën vota për Lul Bravën duke e bërë këtë proces po aq të pabesueshëm; 4) nuk ka sërish asnjë transparencë për listat e anëtarësisë se PDSH; 5) kandidatët nuk janë pyetur për përbërjen e Komisionit, sipas parimit të shokut Stalin “populli voton, votat i numërojmë ne”; 6) zgjedhjet po mbahen ndërkohë që PD është e përçarë me keq se 1 vit më parë! E vetmja gjë që ndryshon nga zgjedhjet e vjedhura në 13 qershor me këto te 22 majit është se po kalojmë nga “Lul Brava” tek “Doktor Dryni”, shkruan Kulluri.
Sipas tij, demokratët po tallen dhe janë të privuar nga vota e lirë dhe përfaqësimi, duke vendosur kështu të tërhiqet nga deklarata e tij për kreun e PD.
Discussion about this post