Të gjitha bashkitë në vend kanë rritur detyrimet e prapambetura gjatë këtij viti me justifikimin se nuk kanë të ardhura t’i shlyejnë ato. Madje shumë prej tyre nuk kanë bërë as investimet që kishin planifikuar për shkak se nuk kanë fonde, por paratë gjinden kur vjen fjala për tenderë dhe shpenzime abuzive. 6 bashki në vend do të shpenzojnë 108 mijë euro për dekorime festash dhe këtë vërteton Agjencia e Prokurimeve. Në kontrata e publikuara në këtë institucion për këtë javë rezulton se 6 prej tyre janë tendera për dekorime.
Me afrimin e festave të fundviti, bashkitë në vendin tonë nuk gjejnë hapësira për të ndihmuar familjet në nevojë, por thurin plane se si të mbushin xhepat me tendera, duke blerë drita dhe mjete të tjera dekorative, thua se kjo iu mungon më së shumti qytetarëve në këtë kohë krize. Në dokument e tregohej se Bashkia Fier është ajo që ka shpenzimet më të larta, rreth 3.2 milionë lekë. Pas sa renditet, Bashkia e Mallakastrës, e cila ka shpallur një tender me vlerë 2.9 milionë lekë pa TVSH, ndërsa në vend të tretë renditet Lezha, e cila do të shpenzojë me një 2 milionë lekë për dekore.
Ditën e djeshme tender për të njëjtin objektiv ka shpallur edhe Bashkia e Korçës, e cila ka vendosur një fond limit prej 2.9 milionë lekësh. Ndërkohë edhe bashkia Roskovec, e cila renditet në institucionet më problematike për detyrimet e prapambetura ka hapur qesen kur bëhet fjalë për tendera të parëndësishëm. Kjo bashki do të shpenzojë për dekore festash plot 1.8 milionë lekë. Më pak do të shpenzojë Bashkia Memaliaj, e cila ka vendosur të japë për dekorime 1.2 milionë lekë.
Nga një përllogaritje e thjeshtë rezulton se, të pesta bashkitë do të shpenzojnë 108 mijë euro për dekorimin e qendrave me rastin e festave të fundvitit. Kujtojmë se, pak kohë më parë kryeministri Rama u tërhoqi “veshin” bashkive në lidhje me shpenzimet dhe detyrat e tyre, por me sa duket ato fjalë qenka harruar shpejt nga kryebashkiakët, të cilët po vazhdojnë me ritëm të lartë shpenzimesh. E.H/ gijotina.com/
Discussion about this post