Ministrja e Jashtme Olta Xhaçka ka reaguar pas akuzave të deputetit demokrat Lefter Gështenja se qeveria do të paguajë 926 mijë euro për të paguar siguracione udhëtimi për punonjësit e Ministrisë së Jashtme deri në fund të këtij viti.
Në një deklaratë zyrtare, Xhaçka është shprehur se mbulimi i sigurimeve shëndetësore, të shëndetit në udhëtim dhe jetës të diplomatëve kur ata shërbejnë jashtë vendit është një detyrim ligjor i MEPJ. Sa i përket fondit prej 926 mijë euro, ajo deklaroi se është i njëjtë me fondin e alokuar gjatë viteve të fundit dhe i parashikuar në Ligjin për Buxhetin e Shtetit.
“Mbulimi i sigurimeve shëndetësore, të shëndetit në udhëtim dhe jetës të diplomatëve kur ata shërbejnë jashtë vendit apo udhëtojnë për arsye pune, është një detyrim ligjor i MEPJ. Ky mbulim, në përputhje me ligjin, aplikohet prej dekadash dhe nuk është një praktikë e aplikuar për herë të parë gjatë vitit 2021. Duhet theksuar po ashtu që edhe fondi i alokuar nga MEPJ për këtë procedurë prokurimi është i njëjtë me fondin e alokuar gjatë viteve të fundit dhe i parashikuar në Ligjin për Buxhetin e Shtetit. Ligji nga ana tjetër, nuk parashikon askund mbulimin me “siguracion udhëtimi”, çka është edhe arsyeja përse MEPJ nuk ka shpenzuar asnjë qindarkë për një shpenzim të tillë. Të akuzosh MEPJ përse paguan sigurimet e shëndetësore, të shëndetit në udhëtim dhe të jetës, të diplomatëve të Shërbimit të Jashtëm shqiptar është po aq e pakuptimtë sa të akuzosh MEPJ përse paguan qiratë e zyrave e të banesave të diplomatëve që përfaqësojnë Shqipërinë nëpër botë”, ka thënë ministrja.
Kujtojmë se, më herët Gështenja tha se qeveria do harxhojë 2800 euro për çdo diplomat shqiptar dhe familjarët e tyre për “udhëtime imagjinare”. Sipas dokumenteve të tenderit që Gështenja i ka publikuar në Facebook, ky siguracion do vlejë për 335 persona, diplomatët dhe familjarët e tyre, ndërsa qytetarët në vend duhet të përballojnë çmimet që rriten çdo ditë.
Discussion about this post