Shpenzon $2 milionë në vit për të qenë “i pavdekshëm”, 47-vjeçari tregon efektet e tmerrshme anësore

Një sipërmarrës i Silicon Valley, Bryan Johnson, i njohur për përkushtimin e tij ekstrem ndaj përpjekjes për të “jetuar përgjithmonë”, ka ndarë disa nga simptomat negative që përjeton për shkak të mënyrës së tij të jetesës.

Johnson, që është subjekti kryesor i dokumentarit të Netflix “Don’t Die: The Man Who Wants to Live Forever”, ka ndërmarrë hapa të shumtë për të dukur dhe ndier më i ri se mosha e tij reale prej 47 vjeç. Përpjekjet e tij i kanë siguruar “zemrën e një 37-vjeçari” dhe “kapacitetin pulmonar (mushkëritë) të një 18-vjeçari”, por jeta e tij është larg normales.

Ai ka pranuar procedura ekstreme si redaktimi i ADN-së, injektimi me qeliza burimore dhe shkëmbimi i gjakut me djalin e tij, duke treguar seriozitetin e tij për të mbajtur rininë.

Por së fundmi, Johnson ka vendosur të ndërpresë përdorimin e rapamicin, një ilaç kundër kancerit që tregoi efekte anti-plakje në testet me minj.

Në një postim në Twitter, Johnson tha:

“Pavarësisht potencialit të madh të treguar nga testet para-klinike, unë dhe ekipi im arritëm në përfundimin se përfitimet e përdorimit të rapamicin gjatë gjithë jetës nuk justifikojnë efektet anësore të rënda.”

Efektet përfshinin infeksione të shpeshta të lëkurës dhe indeve të buta, anomali të lipideve, rritje të glukozës, rritje të rrahjeve të zemrës në gjendje pushimi.

Pas testimeve të shumta dhe rregullimit të dozave pa rezultat, ai vendosi ta ndalojë përdorimin e rapamicin plotësisht.

Më shqetësuese, Johnson zbuloi se një studim i ri tregoi se rapamicin mund të shkaktojë përshpejtim të plakjes te njerëzit, duke dhënë rezultate të kundërta me atë që ai po përpiqej të arrinte.

Ai shkroi: “Më 27 tetor, një studim i ri tregoi se rapamicin ishte një nga disa ndërhyrjet e supozuara të jetëgjatësisë që shkaktoi përshpejtim të plakjes në 16 matje epigjenetike të plakjes.”

Bryan thekson se duhet më shumë kërkim për këto substanca eksperimentale, pasi teknologjia dhe matjet shkencore për jetëgjatësinë janë ende në zhvillim.

Ndërkohë, për shumicën prej nesh, ndoshta është më e lehtë të pranojmë plakjen natyrshëm.