Jorgo Goro ish-kryebashkiaku i Himarës ka lënë sot qelinë e burgut. Goro ka shlyer dënimin prej dy vitesh për akuzën shpërdorim detyre.
Kujtojmë se miku i Ramës u dënua për tjetërsimin e pronës në Dhërmi ku përfitues ishte Artan Gaçi, bashkëshorti i ish-ministres së Mbrojtjes, Olta Xhaçka.
Kryetari në detyrë i Bashkisë së Himarës Jorgo Goro, në bashkëpunim me vartës dhe zyrtarë të Kadastrës, nëpërmjet dokumenteve të falsifikuara mundësuan kalimin e sipërfaqeve të konsiderueshme tokë shtet në Himarë, në favor të privatëve, pasuri që aktualisht janë në zotërim të një shoqërie të zotëruar nga Artan Gaçi, bashkëshorti i deputetes socialiste Olta Xhaçka, i cili ka fituar statusin e investitorit strategjik. Për këtë çështje, Goro u deklarua fajtor dhe u dënua më 13 mars me 2 vjet e 20 ditë burg.
Goro u dënua edhe për “fshehje e mosdeklarim të pasurisë”, për një apartament në emër të një biznesmeni, por që ishte pasuri e fshehur e zyrtarit vendor.
Ndërkohë Jorgo Goro, është dënuar në shkallën e parë me 1 vit e 4 muaj me gjykim të shkurtuar dhe heqjen e të drejtës për të ushtruar funksione publike, edhe për dosjen e dytë lidhur me favorizimin e Arqile Bollanos për fitimin e një prone. Vendimi ende s’ka marrë formë të prerë.
Discussion about this post