Përjashtohet një efektiv nga rradhët e Policisë në Fier. Kjo pasi është kapur duke kërkuar para në këmbim të mosvënies së gjobës për shkelje të rregullave të qarkullimit ndaj një qytetari.
Rasti në fjalë u bë publik në media, ndërsa kreu i Policisë së Shtetit ka miratuar menjëherë përjashtimin e tij nga strukturat policisë. Sakaq, strukturat ligjzbatuese kanë nisur hetimet për veprën penale të korrupsionit dhe shpërdorimit të detyrës.
Njoftimi i policisë:
Drejtori i Përgjithshëm i Policisë së Shtetit, porsa është njohur me një lajm të publikuar në rrjetet sociale, ku në aksin rrugor “Fier-Vajkan”, një punonjës Policie, duke shpërdoruar detyrën, i ka kërkuar një drejtuesi mjeti lekë në këmbim të mosvendosjes së gjobës, ka miratuar përjashtimin e menjëhershëm nga radhët e Policisë së Shtetit, të punonjësit të Policisë Inspektor H. M. me detyrë punonjës i Policisë Rrugore Fier.
Po në lidhje me këtë rast, ndaj punonjësit të Policisë inspektor H. M., AMP ka nisur hetimin për shpërdorim detyre dhe korrupsion. Policia e Shtetit falënderon mediat e qytetarët që denoncojnë rastet e abuzimit të punonjësve të Policisë me detyrën dhe inkurajon ata që të vijojnë të denoncojnë çdo tentativë të tillë, duke i siguruar për reagim të menjëhershëm dhe të paanshëm
Discussion about this post