Inspektori i Lartë i Drejtësisë ka përfunduar hetimin disiplinor ndaj magjistrates Pajtime Fetahu, me detyrë gjyqtare pranë Gjykatës së Rrethit Gjyqësor Elbasan. Kujtojmë se Fetahu akuzohet për korrupsion pas publikimit të disa fakteve të transmetuara në një emision investigativ në vitin 2017, ku magjistratja kundrejt një shume monetare kishte marrë përsipër aplikimin e minimumit të dënimit për një të pandehur në paraburgim, që akuzohej për tre vepra penale.
Kohë më parë, KLD pezulloi magjistraten nga detyra dhe hetimi disiplinor, gjithashtu u pezullua, deri në përfundim të procedimit penal. Më pas, duke shyqrtuar dosjen me kujdes Inspektori i Lartë i Drejtësisë doli në përfundimin se hetimi ndaj magjistrates ishte i paplotë, prandaj vendosi vijimin e hetimit për të njëjtën shkelje disiplinore, duke evidentuar se veprimet e magjistrates janë kryer me dashje dhe në mënyrë të përsëritur. “Janë ndërmarrë veprime, që përbëjnë një mos përmbushje të rregullt të detyrës, në shkelje të rregullave të solemnitetit, të sjelljes në marrëdhënie me palët në proces, si dhe komunikimit ex parte të gjyqtares”.
Sipas ILD, është e patolerushme që një gjyqtare me eksperiencë aq të gjatë në drejtësi, të cenojë parimin e paanshmërisë në gjykim Për këtë arsye, Inspektori i Lartë i Drejtësisë i kërkon KLGJ-së pranimin e kërkesës për fillimin e procedimit disiplinor ndaj Fetahut dhe caktimin e masës disiplinore: “Ulje e përkohshme e pagës deri në 40% për një periudhë jo më të gjatë se një vit”.
Discussion about this post