Shpërndante drogë në Tiranë, arrestohet 31-vjeçari, i kapen 1 kg kanabis

Komisiariati i Policisë Nr. 2 në Tiranë ka vazhduar aksionet për goditjen e aktiviteteve kriminale në fushën e prodhimit dhe shpërndarjes së lëndëve narkotike, pas një procesi hetimesh, duke u bazuar në informacionet e marra në rrugë operative se një shtetas, shpërndante lëndë narkotike cannabis sativa në zona të ndryshme të Tiranës, kanë organizuar dhe finalizuar me sukses operacionin policor të koduar “Hide”.

Në kuadër të këtij operacioni u bë kapja dhe arrestimi në flagrancë i shtetasit Hermes Hasani, 31 vjeç, banues në Tiranë, për veprën penale “Prodhimi dhe shitja e narkotikëve”.

Në rrugën “Dritan Hoxha”, në afërsi të një kompleksi pallatesh, gjatë kontrollit të ushtruar në automjetin e këtij shtetasi, nga policia, është gjetur dhe sekuestruar 1 kg lëndë e dyshuar narkotike cannabis sativa.

Nga hetimet e kryera, ka rezultuar se ky shtetas, pasi siguronte sasi të konsiderueshme të lëndës narkotike cannabis sativa, e ndante atë dhe e shiste më pas në doza, në zonën e Laprakës dhe te Fusha e Aviacionit.

Materialet i kaluan Prokurorisë pranë Gjykatës së Rrethit Gjyqësor Tiranë, për veprime të mëtejshme procedurale.