Kryeministri Edi Rama ka reaguar pasi dështoi me propagandën për kompaninë offshore që pritet të ndërtojë Portin e Durrësit, duke u penduar për deklaratën që e vendosi në qendër të kritikave për fake news.
Rama shkruan i penduar në Twiter se reagimi i tij ishte i nxituar dhe kërkon ndjesë që gënjeu.
“Postimi i djeshëm mbi “Manhatanin e Zagrebit” nuk reflekton të vërtetën e ecurisë së mëtejshme të projektit dhe kërkoj ndjesë për nxitimin! Një kontroll i thjeshtë do mjaftonte për të mos gabuar, po nuk do justifikohem si e pse ndodhi. Kush s’është mësuar të gënjejë kërkon falje!” shkruan Rama.
Kujtojmë se mbrëmjen e së enjtes Rama publikoi në Twitter një artikull të BIRN ku shkruhej se kompania “Eagle Hills” do të ndërtojë “Manhatanin e Zagrebit” në Kroaci. Kreu i qeverisë, shkruan se kjo është e njëjta kompani e Muhammed El Alabbar e cila do të ndërtojë Portin e Durrësit.
Por mediat kroate raportojnë se qytetarët dhe opozita në Zagreb kanë fituar në përpjekjen për të rrëzuar projektin e qeverisë në Kroaci për të ndërtuar atë që do të quhej Manhattan i Zagrebit.
Mediat shkruanin se pas presionit të shumtë, u publikua marrëveshja për këtë projekt që nxirrte në pah se kryebashkiaku Milan Bandić donte t’u jepte arabëve gjithçka, duke përfshirë pronësinë e tokës më të shtrenjtë në vend, një skemë e ngjashme me atë të projektit të Durrësit në vendin tonë, projekt që ka marrë një lumë kritikash nga opozita.
Discussion about this post