Ish-mesfushori i ekipit kombëtar, Altin Lala ka kritikuar trajnerin Edi Reja për vendimin që mori në ndeshjen ndaj Polonisë duke lënë jashtë fushës së lojës sulmuesin Armando Broja. Shtatlarti u inkuadrua me kuqezinjtë vetëm në fraksionin e dytë.
“Broja në stol? Besoj se nuk kemi si ai. Unë këtë gjë akoma nuk e kam kuptuar, kjo do ishte pyetja e parë që do i bëja trajnerit. Unë që para ndeshjes edhe me Hungarinë e shihja që Broja është lojtar shumë i talentuar dhe dëgjoja që donte ta ruante. Por edhe Mesi ka luajtur 17 vjeç, jo se dua ta krahasoj me Ronaldo e Mesi.
Por nuk kemi luksin të lëmë një si Broja në pankinë, edhe në sfidat e fundit ka bërë jashtëzakonisht mirë, ka shënuar gola. Ka një start në një kundër një që është i frikshëm, i rrezikshëm për kundërshtarët.
Kjo na mungoi dje dhe këtë nuk e kuptova, nuk është logjike. Mund të luante e humbnim gjithsesi, por mund të kishim gjasa më shumë me shpejtësi e thellësi. Është gjynah ta lësh atë djalë në pankinë. Unë nuk e kuptoj, aq më tepër Polonia kishte një lojtar mbrojtës në moshë, kishte hapësira. Ai është rritur në Angli, është në Premier Ligë dhe nuk ka arsye pse të mos luajë”, theksoi Lala.
