Një zjarr ka përfshirë një banesë në lagjen “18 Shtatori” në Gjirokastër, pranë Universitetit të qytetit, duke shkaktuar panik te banorët e zonës. Dy të moshuar kanë mbetur të asfiksuar si pasojë e flakëve dhe tymit, ndërsa njëri prej tyre ka marrë plagë të lehta në trup. Dyshohet se shkak i zjarrit ka qenë një bombol gazi.
Zjarrfikësit kanë ndërhyrë menjëherë për të vënë situatën nën kontroll dhe për të shpëtuar banorët. Fatmirësisht, nuk raportohet për viktima, por dëmet materiale janë të konsiderueshme. Ngjarja ka ndodhur në banesën e shtetasit Piro Kristidhi, 86 vjeç, ku dyshohet se shkak i zjarrit ka qenë rrjedhja e gazit nga një bombol. I moshuari nuk kishte arritur të bënte montimin e duhur të bombulës në sobën që përdorej për ngrohje, dhe në momentin që tentoi ta ndizte, gazra që ishin grumbulluar shpërthyen në flakë.
I moshuari ka arritur të dalë nga banesa, por ka pësuar asfiksi dhe ka kërkuar ndihmë mjekësore. Zjarrfikësit ndërhynë shpejt, duke neutralizuar dhe shuar flakët plotësisht me ujë dhe fikës zjari. Pavarësisht dëmeve materiale, zjarrfikësit arritën të mos lejojnë depërtimin e flakëve në banesat përreth.
Discussion about this post