Një shpërthim ka ndodhur gjatë natës që sapo lamë pas në shkallët e jashtme të një godine të përshatur si studio muzikore në , në rrugën “Arben Broci” në Kamëz.
Policia bën me dije se rreth orës 03:30, në shkallët e studios muzikore është dëgjuar një shpërthim, i ngjashëm me lëndët plasëse ose lëndët piroteknike.
Studio është në pronësi të Astrit Allaraj, teksa mësohet se nuk ka pasur njeri brenda në momentin e ngjarjes.
Sipas burimeve, Allaraj ndodhej tek familjarët në Itali dhe nuk është mundur të merret në pyetje.
Ngjarja e sotme është e katërta brenda kësaj jave ku përdoren lëndë shpërthyese.
Dy ditë më parë dy shpërthime me eksploziv u regjistruan në Orikum dhe Tropojë, teksa më herët një sasi lënde plasëse ishte vendosur pranë një bankomati në Krujë, me qëllim për ta dëmtuar dhe për të marrë paratë prej tij.
Njoftimi i policisë
Më datë 17.11.2024, rreth orës 03:30, në rrugën “Arben Broci”, në shkallët e jashtme të një godine të përshatur si studio muzikore, në pronësi të shtetasit A. A., është dëgjuar një shpërthim, i ngjashëm me lëndët plasëse ose lëndët piroteknike.
Si pasojë ka vetëm dëme materiale (janë dëmtuar pllakat e mermerit dhe xhamat).
Grupi hetimor po vazhdon punën për sqarimin e rrethanave të ngjarjes.
Discussion about this post