Shpërthim në konsullatën ruse në Marsejë, reagon Moska: Dyshojmë për sulm terrorist

Një shpërthim është regjistruar këtë të hënë në një konsullatë ruse në Francë.

Ministria e Brendshme franceze tha se disa shishe plastike u hodhën në murin e konsullatës në qytetin jugor të Marsejës dhe më pas një prej tyre shpërtheu.

Raportohet se si pasojë e shpërthimit nuk ka patur viktima dhe asnjë nga personeli rus nuk u lëndua.

Zëdhënësi i Kremlinit Dmitry Peskov tha se ishte e nevojshme të forcohen të gjitha masat e sigurisë në konsullatat ruse.

Sipas agjencisë shtetërore të lajmeve TASS, Ministria e Jashtme ruse tha se kjo ngjarje lë dyshime për një sulm terrorist dhe kërkoi hetim të plotë nga autoritetet franceze.