Shpërthim në xhami gjatë faljes së akshamit, autoritetet nisin hetimet

Një bombë ka shpërthyer në një xhami të mbushur me besimtarë në verilindje të Nigerisë, duke shkaktuar 5 viktima dhe dhjetëra të plagosur.

Ngjarja e rëndë ndodhi gjatë faljes së mbrëmjes e njohur si namazi i akshamit duke shkaktuar panik dhe kaos mes qytetarëve.

Sipas policisë, të paktën 35 persona u plagosën dhe u transportuan me urgjencë në spitalet lokale.

Zëdhënësi i policisë, Nahum Daso, konfirmoi se autoritetet kanë nisur hetimet për zbardhjen e rrethanave të sulmit.

Pamje të pakonfirmuara që qarkullojnë në rrjetet sociale tregojnë pasojat e shpërthimit: njerëz të tronditur, pluhur në ajër dhe përpjekje për t’u ardhur në ndihmë të plagosurve.

Deri më tani, asnjë grup nuk ka marrë përgjegjësinë për sulmin, por rajoni ka qenë prej vitesh objektiv i sulmeve të grupeve militante islamiste.

Që prej vitit 2009, disa grupe kanë zhvilluar një fushatë të dhunshme me synim krijimin e një kalifati islamik në shtetin Borno, duke goditur shpesh civilë dhe objekte fetare.

Pavarësisht masave të sigurisë, sulmet sporadike ndaj popullsisë civile vazhdojnë, duke thelluar frikën dhe pasigurinë në këtë pjesë të Nigerisë.

Autoritetet u kanë bërë thirrje qytetarëve të qëndrojnë vigjilentë, ndërsa hetimet për autorët e sulmit janë ende në vijim.