Drejtori i Policisë së Elbasanit, Ardian Çipa, ka dhënë një deklaratë për mediat lidhur me aksionin e Policisë së Shtetit të një nate më parë, të finalizuar nga RENEA, në disa qytete të vendit, ku u vunë në pranga të paktën 19 persona. Ai tha se ky aksion ka si synim rritjen e sigurisë së qytetarëve, si dhe evidentimin dhe arrestimin e personave që shkelin ligjin. Gjithashtu Çipa theksoi se këto aksione janë të mirë studiuara.
“Policia e Shtetit është duke punuar për rritjen e sigurisë së jetës së qytetarëve në të gjithë vendin. Po marrim të gjitha masat me qëllim identifikimin e autorëve dhe vendosjen e tyre para drejtësisë. Këto masa kanë vazhduar për një kohë të gjatë. Të gjitha aksionet janë të mirë studiuara”, deklaroi ai.
Çipa foli për dy ngjarje të rënda në Elbasan, ku lidhur me humbjen e jetës së 27-vjeçarit Erion Rexhepi, si pasojë e shpërthimit të eksplozivit, u shpreh se ka qenë një ngjarje aksidentale, kjo pasi viktima nuk kishte një të shkuar kriminale.
“Janë dy ngjarje të rënda. Është punuar për motivin e tyre. Jemi duke bashkëpunuar me prokurorinë për të vënë para përgjegjësisë autorët. Vdekja e shtetasit në Cërrik ishte aksidentale. Personi ka qenë pa probleme, Jemi duke punuar për të sqaruar rrethanat e hetimit sipas detyrimit tonë”, u shpreh Çipa.
Discussion about this post