Sot jepet pretenca për çështjen e Gërdecit, ndaj ish-ministrit të Mbrojtjes, Fatmir Mediu. Mësohet se Zamira Durda kërkon që të bëhet palë në procesin ndaj Mediut.
Gjykata ka vendosur që të mos pranojë Durdën si palë. Durda vuri në lëvizje SPAK pasi humbi djalin e mitur në tragjedinë e Gerdecit.
Akuzat ndaj Mediut dhe shfajësimi
Kujtojmë se SPAK ka përfunduar hetimet për tragjedinë e Gërdecit dhe ka marrë të pandehur ish ministrin e Mbrojtjes Fatmir Mediu, ku iu komunikuan dy akuzat.
SPAK e akuzon për shpërdorim detyre, ndërsa Fatmir Mediu u shpreh se nuk ka asnjë provë të re ndërsa akuzat sipas tij janë të njëjta me ato të 2009.
Mes të tjerash, Mediu ka theksuar se nuk është marrë në pyetje lidhur me aktet që sipas tij ka firmosur, dhe së paku priste që SPAK ta merrte në pyetje.
Sipas Mediut, nuk është urdhri i ministrit që çoi në tragjedi, por se demontimi i armëve ishte çështje sigurie kombëtare
“Më është prezantuar e njëjta akuzë. Ajo e 2009, akuzë e motivuar politikisht pa asnjë provë shtesë. Shpërdorimi i detyrës. Kam kërkuar që të pyetem që në fillim. Motivimi politik është në akuzën e bërë. Nuk është urdhri i ministrit që ka bërë problem. Çdo letër që unë kam nxjerrë ka qenë me referenca ushtarake dhe civile”, tha Mediu.
“Ajo që m’u paraqit është fashikulli i dosjes së prokurorisë së Përgjithshme. Qëndrimi im është se jam i pafajshëm. Nuk e pranoj akuzën. Është sipas marrëveshjeve me Pentagonin me praktikat e demontimit me analizë ndërkombëtare” tha Mediu.
Ish-ministri i Mbrojtjes, Fatmir Mediu akuzohet për shpërdorim detyre nga SPAK në lidhje me tragjedinë e Gërdecit ku nga shpërthimi i punishtes së demontimit të armëve mbetën 26 të vrarë dhe qindra të plagosur.
Discussion about this post