Shpërthimi i ndodhur në Lushnje dy ditë më parë, ku humbën jetën babë e bir, Roland Hoxha 51-vjeç, dhe Elidon Hoxha 23 vjeç, po hetohet nga Prokuroria e Fierit në 3 pista.
Shpërthimi shkaktoi 7 të plagosur, mes të cilëve edhe deputetin Bujar Çela, si dhe dëmtoi biznese e banesa në zonën pranë magazinës ku po kryeshin punimet, që sipas raportimeve është në pronësi të ligjvënësit socialist.
Prokurorët kanë urdhëruar kryerjen e disa ekspertizave për të përcaktuar shkaqet e shpërthimit, ndërsa nga ana e policisë këtë të diele janë referuar materialet organit të akuzës.
Nga raportimet mësohet se tre pistat ku po hetohet janë: shkatërrimi i pronës, shkelje të rregullave të mbrojtjes në punës, si edhe shkelja e lejes subjektit për të kryer ndërtime në atë zonë.
Hetuesit kanë marrë në pyetje dhjetëra dëshmitarë që janë ndodhur në biznes si dhe të tjerë që kanë parë shpërthimin, të cilët kanë treguar ngjarjen dhe veprimet që kanë kryer viktimat para shpërthimit.
Janë sekuestruar dhe janë duke u kqyrur edhe dhjetëra pamje të kamerave të sigurisë së objekteve afër vendit të ngjarjes.
Veprimet po vijojnë ende në terren, ndërsa janë në pritje që edhe ekspertet të thonë fjalën e tyre në lidhje me shkaqet që çuan në ngjarjen e rëndë.
Në pyetje pritet të merret edhe pronari i biznesit, deputetit i PS Bujar Çela, i cili vijon të qëndrojë në Spitalin e Traumës ku po merr ndihmën mjekësore. Së bashku me të ne spital vijon të jetë edhe një 41 vjeçar Sokol Lumi, i cili ka dëmtime në kokë.
Një tjetër i plagosur ndodhet ne Spitalin e Lushnjës, i cili ka cifla nga shpërthimi ne duar. Mësohet se të plagosurit e tjerë kanë marrë mjekim dhe janë larguar banesa.
Discussion about this post