Ministrja e Ekonomisë, Artane Rizvanolli, ka deklaruar ditën e sotme se në tetë ditët e fundit situata energjetike në Kosovë është përkeqësuar jashtë mase. Rizvanolli thotë se plani është që të ketë reduktime dhe më shumë në vazhdim. “Prej disa ditëve jemi duke marrë vërejtje nga organizata e Transmisioneve të Evropës për shkak të disbalancës mes kërkesës dhe ofertës. Ne kemi rrezikuar jo vetëm sistemin tonë energjetik por edhe atë të Shqipërisë dhe Evropës. Për shkak të këtij kodi të operimit KOSTT ka kërkuar të bëhen reduktime. Kemi kërkuar nga KEDS-i që të lajmërojnë më herët qytetarët në mënyrë që të bëhen planifikimet me kohë”, tha ajo.
Rizvanolli thotë se gjendja nuk është e lehtë dhe kriza nuk do të kalojë së shpejti, pro qeveri ka shpresa se situata e reshjeve në Shqipëri mund ta nxjerrin Kosovën nga kriza. “Mund të shpresojmë te përmirësimi i gjendjes atmosferike në Shqipëri në mënyrë që kur ata të plotësojnë nevojat e tyre të na huazojnë energjinë në formë të këmbimit e jo me tarifa të tregut, në mënyrë që ne mund t’ua kthejmë në një kohë kur kemi prodhim më shumë”, deklaroi Rizvanolli.
Discussion about this post