Qeveria Shqiptare dhe ajo e Maqedonisë së Veriut po tentojnë të zbusin Bullgarinë, duke qenë se po bëhet pengesë për hapjen e negociatave. Për të përmirësuar marrëdhëniet mes shteteve dhe zbutur situatën, ditën e sotme është nënshkruar në Sofje memorandumi trepalësh i bashkëpunimit mes Shqipërisë, Bullgarisë dhe Maqedonisë së Veriut për të promovuar korridorin 8. Pas nënshkrimit të memorandumit ministrja e Infrastrukturës dhe Energjisë, Belinda Balluku tha se ndërtimi i kësaj infrastrukture, ka rëndësi thelbësore për zhvillimin e Ballkanit Perëndimor.
Ajo tregoi se, për të përfunduar këtë projekt strategjik të tre palët do lobojnë për të përfituar fondet nga institucionet evropiane për financimin e ndërtimit të plotë të hekurudhës. Çështja është se nga të tre fondet Bullgaria është në BE, kjo do të thotë që së pari fondet do të kalojnë përmes Bullgarisë drejt projektit. Kështu, nëse ky projekt arrihet mund të merret si një sinjal pozitiv për sheshimin e marrëdhënieve mes Bullgarisë dhe Maqedonisë së Veriut.
“Kemi folur për detaje, kemi dakordësuar sesi së bashku mund të ndikojmë institucionet evropiane financiare për mbështetjen e projekteve tona, sidomos atë të hekurudhave, si një nga mënyrat e transportit më eficiente bazuar dhe në agjendën e investimeve të Bashkimit Evropian”, tha Balluku.
Ndër të tjera ajo tregoi se, për të përparuar mbi këtë do të ketë një takim tjetër në Maqedoninë e Veriut e më pas edhe në Tiranë.
