Në mars të këtij viti, Shqipëria mori vëmendjen e botës duke qenë vendi i nderit në Panairin Ndërkombëtar të Turizmit (ITB) në Berlin. Kryeministri Edi Rama dhe ministrja e Turizmit, Mirela Kumbaro, e shpallën këtë një “arritje historike”, duke e promovuar si një sukses të jashtëzakonshëm për vendin. Kryeministri deklaroi me krenari se Shqipëria kishte kapërcyer vende si Katari dhe Arabia Saudite për rritjen e turizmit.
Nën sloganin “Albania All Senses”, stenda shqiptare në ITB Berlin 2025 ishte vërtet mbresëlënëse: një hapësirë gjigante me performanca kulturore, muzikë, kuzhinë tradicionale dhe përvoja dixhitale.
Por, të dhënat e fundit publikuar nga “Kapitali.al” tregojnë se ky spektakël pati një kosto financiare të konsiderueshme. Sipas raportimeve, Ministria e Turizmit ka paguar deri më tani mbi 560 milionë lekë, ose gati 5.8 milionë euro, për pjesëmarrjen në këtë panair. Kjo shifër mbulon shpenzimet për qiranë e stendës, arredimet, darkat gala, si dhe biletat e udhëtimit e hotelet për delegacionin e zyrtarëve.
Kjo shpenzim i madh ngre pyetje, sidomos kur shihet në dritën e sezonit turistik aktual. Për fat të keq, “oguri i mbarë” që shpresonte Kumbaro nuk rezultoi i tillë. Ky vit po karakterizohet nga një sezon turistik i vakët, veçanërisht në zonat bregdetare, ku turistët po ankohen për mungesë infrastrukture, cilësi të dobët shërbimesh dhe çmime të larta.
A ishte një shpenzim i justifikuar përpjekja për të reklamuar Shqipërinë ndërkombëtarisht, apo ishte një investim i shpenzuar kot në një kohë kur problemet e vërteta të turizmit shqiptar janë të brendshme? Përgjigja mbetet e hapur.
Discussion about this post