Partia Demokratike ka reaguar në lidhje me raportin mbi të dhënat e cilësisë së jetës nga “Numbeo”, ku thuhej se Shqipëria renditet e fundit në Evropë për shpenzimet buxhetore në shëndetësi.
Koordinatori për shëndetësinë në PD, Gazmend Koduzi, në një dalje publike fajësoi qeverinë Rama duke thënë se me këtë qeveri nuk mund të ketë zhvillim, ndërsa shtoi se gjatë periudhës së Covid, taksat e qytetarëve shkuan për koncensione dhe jo shërbime.
“Vetëm gjatë periudhës së pandemisë (2020 -2021) janë dhënë nga buxheti i shtetit 4.8 miliardë lekë për koncesionet në shëndetësi, ndërsa për përballimin e pasojave të epidemisë janë dhënë 2.5 miliardë lekë. Taksat e shqiptarëve që janë shpenzuar për të paguar koncesionet korruptive të check up-it, sterilizimit dhe laboratorëve, jo vetëm nuk kanë përmirësuar cilësinë e kujdesit shëndetësor si rrjedhim edhe shëndetin e popullatës, por vetëm e kanë shkatërruar atë dhe kanë mbushur xhepat e klientëve të Ramës. Këtë e tregojnë raporte të ndryshme, ashtu si dhe më i fundit nga Numbeo”, tha Koduzi.
Ndër të tjera, ai shprehet se qeveria gënjen kur propagandon për shëndetësi falas, pasi vetëm gjatë pandemisë, shqiptarët kanë shpenzuar 28 % më shumë para për kujdes shëndetësor.
“Qytetarëve shqiptarë iu premtua shëndetësi falas, por ka ndodhur e kundërta, duke e bërë më të shtrenjtë. Sipas anketës së buxhetit të familjeve nga INSTAT, gjate vitit 2020 që filloi epidemia, shqiptarët kanë shpenzuar 28 % më shumë para për kujdes shëndetësor. Taksat e qytetarëve shqiptarë nuk u përdorën për t’u ardhur në ndihmë atëherë kur kishin nevojë për shëndetin, por qytetarët u detyruan të paguajnë nga xhepi mesatarisht 41,000 lekë për diagnostikime dhe deri në 120,000 lekë për blerjen e barnave”, shtoi ai.
Gjithashtu, ai tha se pandemia u përdor si justifikim për të reduktuar mbikëqyrjen dhe llogaridhënien për prokurimet publike dhe shpenzimet e ndihmës së huaj, duke lejuar që korrupsioni të përhapet gjerësisht.
Discussion about this post