Laert Haxhiu, 31-vjeçari nga Lushnja, që u arrestua në Greqi, po mbahet në burgun e Korydallos. Haxhiu u arrestua pas një ndjekjeje policore në Janinë dhe konsiderohet si autori kryesor i masakrës së Lushnjës në vitin 2017. Interpoli shqiptar kishte shpallur në kërkim ndërkombëtar Haxhiun, ndërsa autoritete greke i kanë caktuar masën e sigurisë së arrestit në burg.
Sipas avokatit të tij, i kërkuari në Shqipëri si pjesëtar i një organizate kriminale, do të kërkojë azil në Greqi, pasi siç pretendon ai, familja e tij ndodhet në Shqipëri në hakmarrje.
Autoritetet shqiptare, siç raportojnë mediat greke, do të lëshojnë një kërkesë për ekstradimin e tij në shtetin fqinj.
Dy shqiptarët që u arrestuan me të pas ndjekjes policore u lanë të lirë pasi i kërkuan falje hetuesisë dhe prokurorit, për veprën penale të trafikimit të emigrantëve të paligjshëm.
Në seancën ku u caktua masa e sigurisë, Haxhiu nuk i pranoi akuzat për vrasjen në Lushnjë në vitin 2017 me dy të vdekur dhe dy të plagosur dhe nuk dëshiron të ekstradohet pranë autoriteteve shqiptare, por kërkon të qëndrojë në Greqi.
Sipas medias greke, çështja do të shkojë në Bordin e Apelit kompetent për të vendosur pro ose kundër ekstradimit të tij dhe më pas në Gjykatën e Lartë.
Haxhiu qëndronte në shtetin fqinj me dokumente të falsifikuara. Në lejen e qëndrimit greke, ai mbante identitetin si Mikis Askalidis, 32 vjeç, lindur në Gjeorgji.
Mbi të dënuarin me 18 vite burg nga Gjykata e Lushnjës rëndojnë veprat penale “Vrasja në rrethana cilësuese”, mbetur në tentativë dhe “Mbajtja pa leje dhe prodhimi i armëve, armëve shpërthyese dhe i municionit”.
Discussion about this post