Ministrja e Ekonomisë në Kosovë Artane Rizvanolli gjatë një dalje për mediat është përgjigjur se është në bisedime me zyrtarë të shtetit shqiptar për të konkluduar në një marrëveshje, ku Shqipëria pritet të ndihmojë Kosovën lidhur me krizën e energjisë elektrike.
“Kemi filluar bisedimet me të gjitha nivelet, me ministrat, kryeministrin e zëvëndeskryeministrin dhe në nivel të KEK-ut dhe KESH-it dhe institucioneve tjera relevante dhe këto bashkëbisedime janë intensifikuar javëve të fundit kur gjendja tek ne ka filluar të përkeqësohet.”
Rizanvolli ka shtuar gjithashtu se Shqipëria deri në këto momente e ka pasur të pamundur të ndihmojë Kosovën përmes këmbimit të energjisë elektrike. Situata e krizës energjitike në Kosovë vjen drejt përkeqësimit, teksa ministrja Rizanvolli bën me dije se qeveria shqiptare ka premtuar se sapo të mundet do të ndihmojë në kapërcimin e kësaj situate.
“ Republika e Shqipërisë deri tash vonë ka qenë duke importuar deri në 3 milionë euro energji për vete e ka pasur të pamundur të na ndihmojë përmes këmbimit. Këto ditë jam duke i parë mezi janë duke e mbuluar kërkesën e vetë dhe kemi premtime që në momentin që është e mundur sado pak do të na ndihmojnë për ta kaluar këtë krizë, ndërsa ne do ta këmbëjme megavat për megavat kur ata kanë nevojë e ne kur të kemi tepricë”, tha Rizvanolli.
Kosova si shumë vende të tjera të botës po përballet me krizën energjitike, e cila është pasur nga rritja e çmimit të shpërndarjes së saj tek qytetarët, të cilët po ashtu theksojnë se nuk mund të përballojnë faturat energjitike.
Discussion about this post